lakṣaṇaparicchedaḥ prathamaḥ

ārya maitreyapraṇītā

madhyāntavibhāgakārikā

lakṣaṇaparicchedaḥ prathamaḥ

lakṣaṇaṁ hyāvṛtistattvaṁ pratipakṣasya bhāvanā|

tatrā'vasthā phalaprāptiryānā ''nuttaryameva ca||1||

abhūtaparikalpo'sti dvayaṁ tatra na vidyate|

śūnyatā vidyate tvatra tasyāmapi sa vidyate||2||

na śūnyaṁ nā'pi cā'śūnyaṁ tasmāt sarvaṁ vidhīyate|

sattvādasattvāt sattvācca madhyamā pratipacca sā ||3||

arthasattvātmavijñaptipratibhāsaṁ prajāyate|

vijñānaṁ nāsti cāsyārthastadabhāvāttadapyasat||4||

abhūtaparikalpatvaṁ siddhamasya bhavatyataḥ|

na tathā sarvathā'bhāvāt tatkṣayānmuktiriṣyate||5||

kalpitaḥ paratantraśca pariniṣpanna eva ca|

arthādabhūtakalpācca dvayā'bhāvācca deśitaḥ||6||

upalabdhiṁ samāśritya nopalabdhiḥ prajāyate|

nopalabdhiṁ samāśritya nopalabdhiḥ prajāyate||7||

upalabdhestataḥ siddhā nopalabdhisvabhāvatā|

tasmācca samatā jñeyā nopalambhopalambhayoḥ||8||

abhūtaparikalpaśca cittacaittāstridhātukāḥ|

tatrārthadṛṣṭirvijñānaṁ tadviśeṣe tu caitasāḥ||9||

evaṁ pratyayavijñānaṁ dvitīyaṁ caupabhogikam|

upabhogaparicchedaprerakāstatra caitasāḥ||10||

chādanādropaṇāccaiva nayanātsaṁparigrahāt|

pūraṇāt triparicchedādupabhogācca karṣaṇāt||11||

nibandhanādābhimakhyād duḥkhanāt kliśyate jagat|

tredhā dvedhā ca saṁkleśaḥ saptadhā'bhūtakalpanāt ||12||

lakṣaṇaṁ cā'tha paryāyastadartho bheda eva ca|

sādhanañceti vijñeyaṁ śūnyatāyāḥ samāsataḥ||13||

dvayā'bhāvo hyabhāvasya bhāvaḥ śūnyasya lakṣaṇam|

na bhāvo nā'pi cā'bhāvao na pṛthaktvaikalakṣaṇam||14||

tathatā bhūtakoṭiścā'nimittaṁ paramārthatā|

dharmadhātuśca paryāyāḥ śūnyatāyāḥ samāsataḥ||15||

ananyathā'viparyāsatannirodhāryagocaraiḥ|

hetutvāccāryadharmaṇāṁ paryāyārtho yathākramam||16||

saṁkliṣṭā ca viśuddhā ca samalā nirmalā ca sā|

abdhātukanakākāśaśuddhivacchuddhiriṣyate||17||

bhoktṛbhojanataddhehapratiṣṭhāvastuśūnyatā|

tacca yena yathā dṛṣṭaṁ yadarthaṁ tasya śūnyatā||18||

śubhadvayasya prāptyartha sadā sattvahitāya ca|

saṁsārā'tyajanārthaṁ ca kuśalasyā'kṣayāya ca||19||

gotrasya ca viśuddhayarthaṁ lakṣaṇavyañjanāptaye|

śuddhaye bu[ddha]dharmāṇāṁ bodhisattvaḥ prapadyate||20||

pudgalasyā'tha dharmāṇāmabhāvaḥ śūnyatā'tra hi|

tadabhāvasya sadbhāvastasmin sā śūnyatā'parā||21||

saṁkliṣṭā cedbhavennāsau muktāssyuḥ sarvadehinaḥ|

viśuddhā cedbhavennā'sau vyāyāmo niṣphalo bhavet||22||

na kliṣṭā nā'pi va'ākliṣṭā śuddhā'śuddhā na caiva sā|

prabhāsvaratvāccittasya kleśasyāgantukatvataḥ||23||

||iti lakṣaṇaparicchedaḥ prathamaḥ||

Āvaraṇaparicchedo dvitīyaḥ

āvaraṇaparicchedo dvitīyaḥ

vyāpi prādeśikodriktasamādānavivarjanam|

dvayāvaraṇamākhyātaṁ navadhā kleśalakṣaṇam ||1||

saṁyojanānyāvaraṇamudvegasamupekṣayoḥ|

tattvadṛṣṭeśca satkāyadṛṣṭestadvastuno'pi ca||2||

nirodhamārgaratneṣu lābhasatkāra eva ca|

saṅkleśasya parijñāne śubhādau daśadhā'param||3||

aprayogo'nāyatane'yogavihitaśca yaḥ|

notpattiramanaskāraḥ sambhārasyā'prapūrṇatā||4||

gotramitrasya vaidhuryaṁ cittasya parikheditā|

pratipatteśca vaidhuryaṁ kuduṣṭajanavāsatā||5||

dauṣṭhulyamavaśiṣṭatvaṁ trayāt prajñā'vipakvatā|

prakṛtyā caiva dauṣṭhulyaṁ kausīdyaṁ ca pramāditā||6||

saktirbhave ca bhoge ca līnacittatvameva ca|

aśraddhā'nadhimuktiśca yathārutavicāraṇā||7||

saddharme'gauravaṁ lābhe gurutā'kṛpatā tathā|

śrutavyasanamalpatvaṁ samādhyaparikarmitā||8||

śubhaṁ bodhiḥ samādānaṁ dhīmattvā'bhrāntyanāvṛtī|

nṛtyatrāso'matsaritvaṁ vaśitvañca śubhādayaḥ||9||

trīṇi trīṇi ca eteṣāṁ jñeyānyāvaraṇāni hi|

pakṣyapāramitābhūmiṣvanyadāvaraṇaṁ punaḥ||10||

vastvakauśalakausīdyaṁ samādherdvayahīnatā|

aropaṇā'tha daurbalyaṁ dṛṣṭidauṣṭhulyaduṣṭatā||11||

aiśvaryasyā'tha sugateḥ sattvā'tyāgasya cāvṛtiḥ|

hānivṛddhyośca doṣāṇāṁ guṇānāmavatāraṇe||12||

vimocane'kṣayatve ca nairantarye śubhasya ca|

niyatīkaraṇe dharmasambhogaparipācane||13||

sarvatragārthe agrārthe niṣyandāgrārtha eva ca|

niṣparigrahatārtha ca santānā'bheda eva ca||14||

nissaṅkleśaviśuddhyarthe'nānātvārtha eva ca|

ahīnā'nadhikārthe ca caturdhāvaśitāśraye||15||

dharmadhātāvavidyeyamakliṣṭā daśadhāvṛtiḥ|

daśabhūmivipakṣeṇa pratipakṣāstu bhūmayaḥ||16||

kleśāvaraṇamākhyātaṁ jñeyāvaraṇameva ca|

sarvāṇyāvaraṇānīha yatkṣayānmuktiriṣyate||17||

||ityāvaraṇaparicchedo dvitīyaḥ||

tattvaparicchedastṛtīyaḥ

tattvaparicchedastṛtīyaḥ

mūlalakṣaṇatattvamaviparyāsalakṣaṇam|

phalahetumayaṁ tattvaṁ sūkṣmaudārikameva ca||1||

prasiddhaṁ śuddhiviṣayaṁ saṅgrāhyaṁ bhedalakṣaṇam|

kauśalyatattvaṁ daśadhā ātmadṛṣṭivipakṣataḥ||2||

svabhāvastrividho'sacca nityaṁ saccā'pyatattvataḥ|

sadasattattvataśceti svabhāvatrayamiṣyate||3||

samāropā'pavādasya dharmapudgalayoriha|

grāhyagrāhakayoścāpi bhāvā'bhāve ca darśanam||4||

yajjñānānna pravarteta taddhi tattvasya lakṣaṇam|

asadartho hyanityārtha utpādadavyayalakṣaṇaḥ||5||

samalā'malabhāvena mūlatattve yathākramam|

duḥkhamādānalakṣmākhyaṁ sambandhenā'paraṁ matam||6||

abhāvaścāpyatadbhāvaḥ prakṛtiḥ śūnyatā matā|

alakṣaṇañca nairātmyaṁ tad-vilakṣaṇameva ca||7||

svalakṣaṇañca nirdiṣṭaṁ duḥkhasatyamato matam|

vāsanā'tha samutthānamavisaṁyoga eva ca||8||

svabhāvadvayanotpattirmalaśāntidvayaṁ matam|

parijñāyāṁ prahāṇe ca prāptisākṣātkṛtāvayam||9||

mārgasatyaṁ samākhyātaṁ prajñaptipratipattitaḥ|

tathodbhāvanayaudāraṁ paramārthantu ekataḥ||10||

arthaprāptiprapattyā hi paramārthastridhā mataḥ|

nirvikārā'viparyāsapariniṣpattito dvayam||11||

lokaprasiddhamekasmāt trayād yuktiprasiddhakam|

viśuddhagocaraṁ dvedhā ekasmādeva kīrtitam||12||

nimittasya vikalpasya nāmnaśca dvayasaṅgrahaḥ|

samyagjñānasatattvasya ekenaiva ca saṅgrahaḥ||13||

pravṛttitattvaṁ dvividhaṁ sanniveśakupannatā|

ekaṁ lakṣaṇavijñaptiśuddhisamyakprapannatā||14||

ekahetutvabhoktṛtvakartṛtvavaśavartane|

ādhipatyārthanityatve kleśaśuddhyāśraye'pi ca||15||

yogitvā'muktamuktatve ātmadarśanameṣu hi|

parikalpavikalpārthadharmatārthena teṣu te||16||

anekatvā'bhisaṅkṣepaparicchedārtha āditaḥ|

grāhakagrāhyatadgrāhabījārthaścā'paro mataḥ||17||

veditārthaparicchedabhogāyadvārato'param|

punarhetuphalāyāsānāropā'napavādataḥ||18||

aniṣṭeṣṭaviśuddhīnāṁ samotpattyādhipatyayoḥ|

samprāptisamudācārapāratantryārthato'param||19||

grahaṇasthānasandhānabhogaśuddhidvayārthataḥ|

phalahetūpayogārthanopayogāttathā'param||20||

vedanāsanimittārthatannimittaprapattitaḥ|

tacchamapratipakṣārthayogādaparamiṣyate||21||

guṇadoṣā'vikalpena jñānena parataḥ svayam|

niryāṇādaparaṁ jñeyaṁ saprajñaptisahetukāt||22||

nimittāt praśamāt sārthāt paścimaṁ samudāhṛtam||

||iti tattvaparicchedastṛtīyaḥ||

pratipakṣabhāvanā'vasthāphalaparicchedaścaturthaḥ

pratipakṣabhāvanā'vasthāphalaparicchedaścaturthaḥ

dauṣṭhulyāt tarṣahetutvād vastutvādavimohataḥ|

catussatyāvatārāya smṛtyupasthānabhāvanā||1||

parijñāte vipakṣe ca pratipakṣe ca sarvathā|

tadapāyāya vīryaṁ hi caturdhā sampravartate||2||

karmaṇyatā sthitestatra sarvārthānāṁ samṛddhaye|

pañcadoṣaprahāṇā'ṣṭasaṁskārāsevanā'nvayā||3||

kausīdyamavavādasya sammoṣo laya uddhavaḥ|

asaṁskāro'tha saṁskāraḥ pañca doṣā ime matāḥ||4||

āśrayo'thāśritastasya nimittaṁ phalameva ca|

ālambane'sammoṣo layauddhatyānubuddhyanā||5||

tadapāyā'bhisaṁskāraḥ śāntau praśaṭhavāhitā|

ropite mokṣabhāgīye cchandayogādhipatyataḥ||6||

ālambane'sammoṣāvisāravicayasya ca|

vipakṣasya hi saṁlekhāt pūrvasya phalamuttaram||7||

dvau dvau nirvedhabhāgīyāvindriyāṇi balāni ca|

āśrayāṅgaṁ svabhāvāṅgaṁ niryāṇāṅgaṁ tṛtīyakam||8||

caturthamanuśaṁsāṅgaṁ niḥkleśāṅgaṁ tridhā matam|

nidānenāśrayeṇeha svabhāvena ca deśitam||9||

paricchedo'tha samprāptiḥ parasambhāvanā tridhā|

vipakṣapratipakṣaśca mārgasyāṅgaṁ tadaṣṭadhā||10||

dṛṣṭau śīle'tha saṁlekhe paravijñaptiriṣyate|

kleśopakleśavaibhutvavipakṣapratipakṣatā||11||

anukūlā viparyastā sānubandhā viparyayā|

aviparyastaviparyāsā'nanubandha ca bhāvanā||12||

ālambanamanaskāraprāptitastad viśiṣṭatā|

hetvavasthā'vatārākhyā prayogaphalasaṁjñitā||13||

kāryākāryaviśiṣṭā ca uttarā'nuttarā ca sā|

adhimuktau praveśe ca niryāṇe vyākṛtāvapi||14||

kathikatve'bhiṣeke ca samprāptāvanuśaṁsane|

kṛtyānuṣṭhāna uddiṣṭā dharmādhātau tridhā punaḥ||15||

aśuddhāśuddhaśuddhā ca viśuddhā ca yathārthataḥ|

pudgalānāṁ vyavasthānaṁ yathāyogamato matam||16||

bhājanatvaṁ vipākākhyaṁ balantasyādhipatyataḥ|

rucirvṛddhirviśuddhiśca phalametad yathākramam||17||

uttarottaramādyañca tadabhyāsat samāptitaḥ|

ānukūlyād vipakṣācca visaṁyogād viśeṣataḥ||18||

uttarā'nuttaratvācca phalamanyat samāsataḥ|

||iti pratipakṣabhāvanādiparicchedaścaturthaḥ||

yānā'nuttaryaparicchedaḥ pañcamaḥ

yānā'nuttaryaparicchedaḥ pañcamaḥ

ānuttaryaṁprapattau hi punarālambane matam|

samudāgama uddiṣṭaṁ pratipattistu ṣaḍ vidhā||1||

paramā'tha manaskāre anudharme'ntavarjane|

viśiṣṭā cāviśiṣṭā ca paramā dvādaśātmikā||2||

audāryamāyatatvañca adhikaro'kṣayātmatā|

nairantaryamakṛcchratvaṁ vittatvañca parigrahaḥ||3||

ārambhaprāptiniṣyandaniṣpattiḥ paramā matā|

tataśca paramārthena daśa pāramitā matāḥ||4||

dānaṁ śīlaṁ kṣamā vīryaṁ dhyānaṁ prajñā upāyatā|

praṇidhānaṁ balaṁ jñānametāḥ pāramitā daśa||5||

anugraho'vighātaśca karma tasya ca marṣaṇam|

guṇavṛddhiśca sāmarthyamavatāravimocane||6||

akṣayatvaṁ sadā vṛttirniyataṁ bhogapācane|

yathāprajñaptito dharmamahāyānamanaskriyā||7||

bodhisattvasya satataṁ prajñayā triprakārayā|

dhātupuṣṭayaipraveśāya cārthasiddhyai bhavatyasau||8||

saṁyuktā dharmacaritaiḥ sā jñeyā daśabhiḥ punaḥ|

lekhanā pūjanā dānaṁ śravaṇaṁ vācanod grahaḥ||9||

prakāśanā'tha svādhyāyaścintanā bhāvanā ca tat|

ameyapuṇyaskandhaṁ hi caritaṁ tad daśātmakam||10||

viśeṣādakṣayatvācca parānugrahato'śamāt|

avikṣiptā'viparyāsapraṇatā cā'nudhārmikī||11||

vyutthānaṁ viṣaye sārastathāsvādalayoddhavaḥ|

sambhāvanā'bhisandhiśca manaskāre'pyahaṁkṛtiḥ||12||

hīnacittañca vikṣepaḥ parijñeyo hi dhīmatā|

vyañjanā'rthamanaskāre'visāre lakṣaṇadvaye||13||

aśuddhaśuddhāvāgantukatve'trāsitā'nunnatau|

saṁyogāt saṁstavāccaiva viyogādapyasaṁstavāt||14||

arthasattvamasattvañca vyañjane so'viparyayaḥ|

dvayena pratibhāsatvaṁ tathā cā'vidyamānatā||15||

arthe sa cā'viparyāsaḥ sadasattvena varjitaḥ|

tajjalpabhāvito jalpamanaskārastadāśrayaḥ||16||

manaskāre'viparyāso dvayaprakhyānakāraṇe|

māyādivadasattvañca sattvañcā'rthasya tanmatam||17||

so'visāre'viparyāso bhāvā'bhāvā'visārataḥ|

sarvasya nāmamātratvaṁ sarvakalpā'pravṛttaye||18||

svalakṣaṇe'viparyāsaḥ paramārthe svalakṣaṇe|

dharmadhātuvinirmukto yasmād dharmo na vidyate||19||

sāmānyalakṣaṇantasmāt sa ca tatrā'viparyayaḥ|

viparyastamanaskārā'vihāniparihāṇitaḥ||20||

tadaśuddhirviśuddhiśca sa ca tatrā'viparyayaḥ|

dharmadhātorviśuddhatvāt prakṛtyā vyomavatpunaḥ||21||

dvayasyāgantukatvaṁ hi sa ca tatrā'viparyayaḥ|

saṁkleśaśca viśuddhiśca dharmapudgalayorna hi||22||

asattvāt trāsatāmānau nā'taḥ so'trā'viparyayaḥ|

pṛthaktvaikatvamantaśca tīrthyaśrāvakayorapi||23||

samāropā'pavādā'nto dvidhā pudgaladharmayoḥ|

vipakṣapratipakṣā'ntaḥ śāśvatocchedasaṁjñitaḥ||24||

grāhyagrāhakasaṁkleśavyavadāne dvidhā tridhā|

vikalpadvayatā'ntaśca sa ca saptavidho mataḥ||25||

bhāvā'bhāve praśāmye'tha śamane trāsyatadbhaye|

grāhyagrāhe'tha samyaktvamithyātve vyāpṛtau na ca||26||

ajanmasamakālatve sa vikalpadvayā'ntatā|

viśiṣṭā cā'viśiṣṭā ca jñeyā daśasu bhūmiṣu||27||

vyavasthānantato dhātuḥ sādhyasādhanadhāraṇā|

avadhārapradhārā ca prativedhaḥ pratānatā||28||

pragamaḥ praśaṭhatvañca prakarṣālambanammatam|

avaikalyā'pratikṣepo'vikṣepaśca prapūraṇā||29||

samutpādo nirūḍhiśca karmaṇyatvā'pratiṣṭhitā|

nirāvaraṇatā tasyā'praśrabdhisamudāgamaḥ||30||

śāstraṁ madhyavibhāgaṁ hi gūḍhasārārthameva ca|

mahārthañcaiva sarvārthaṁ sarvā'narthapraṇodanam||31||

||iti yānānuttarya paricchedaḥ pañcamaḥ||

samāptā madhyāntavibhāgakārikāḥ